Barzanî: Ocalan nameyek ji min re şandiye

HEWLÊR - Li gorî nûçeya rojnameya Hawlatî, Serokê Herêma Kurdistanê Mesûd Barzanî di civîna bi serokên partiyên herêmê re çêkirî de gotiye ku, di vê dawiyê de Rêberê PKK'ê Abdullah Ocalan nameyek ji wî re şandiye.

Rojnemeya Hawlatî ku hefteyê du caran li Herêma Federal ya Kurdistanê tê weşandin û navenda wê li bajarê Silêmaniyê ye nûçeyek weşand û diyar kir ku, Barzanî gotiye Ocalan ji wî re nameyek şandiye. Rojname diyar kiriye ku Barzanî di civîna xwe ya bi serokên 12 partiyên herêmê re ev yek eşkere kiriye gotiye ku, ji bona pêngavên aştiyane ‘Ocalan nameyek ji wî re şandiye.’

Civîna ku 30’ê Hezîranê pêk hatibû li nehiyeya Mesîf a Selahedîn ya girêdirayî Hewlêrê pêk hat. Ev civîn piştî gera Barazanî ya derveyî welat û hatina Wezîrê Bazirganiyê yê Tirkiyeyê Zafer Çaglayan, pêk hat. Rojname agahî li ser navê yek ji berşdarên civînê belav kir û da zanîn ku yêku agahî dayî nexwestiye navê xwe eşkere bike.



ANF NEWS AGENCY